دفاعی تعاون، علاقائی امن اور امتِ مسلمہ کے اتحاد پر اہم ملاقاتیں
کائرہ (رانا علی ذوہیب )
فیلڈ مارشل سید عاصم منیر، نشانِ امتیاز (ملٹری)، ہلالِ جرات، چیف آف آرمی اسٹاف، ان دنوں عرب جمہوریہ مصر کے سرکاری دورے پر ہیں۔ اس دورے کا مقصد پاکستان اور مصر کے درمیان دفاعی تعاون اور عسکری روابط کے فروغ کو مزید مضبوط بنانا ہے۔
دورے کے دوران فیلڈ مارشل عاصم منیر نے مصری وزیرِ دفاع و پیداوار جنرل عبدالماجد سقر اور چیف آف اسٹاف مصری افواج لیفٹیننٹ جنرل احمد خلیفہ فتحی سے علیحدہ علیحدہ ملاقاتیں کیں۔ ملاقاتوں میں باہمی دلچسپی کے امور، علاقائی سلامتی کی صورتحال، اور دوطرفہ دفاعی تعاون پر تفصیلی تبادلہ خیال کیا گیا۔
آرمی چیف نے اس موقع پر کہا کہ مصر ایک برادر اسلامی ملک ہے، اور دونوں ممالک کے درمیان تعاون نہ صرف عوام کے لیے مفید ثابت ہوگا بلکہ خطے میں امن و استحکام کے فروغ میں بھی اہم کردار ادا کرے گا۔
وزارتِ دفاع پہنچنے پر فیلڈ مارشل سید عاصم منیر کو گارڈ آف آنر پیش کیا گیا، جب کہ انہوں نے نامعلوم سپاہی کی یادگار اور سابق مصری صدر محمد انور السادات کی قبر پر پھول چڑھائے۔
آرمی چیف نے اپنے دورے کے دوران جامعۃ الازہر کے شیخِ اعظم احمد الطیب سے بھی ملاقات کی۔ شیخِ اعظم نے امتِ مسلمہ کو درپیش چیلنجز پر اظہارِ خیال کیا، جب کہ فیلڈ مارشل عاصم منیر نے زور دیا کہ انتہاپسندانہ نظریات اور اسلام کی مسخ شدہ تعبیرات کے خاتمے کے لیے اجتماعی کوششیں ناگزیر ہیں۔
دورے کو پاکستان اور مصر کے درمیان دفاعی و مذہبی ہم آہنگی کے فروغ کی ایک اہم پیش رفت قرار دیا جا رہا ہے۔
