Author
پاکستان کو ایٹمی قوت بنے 28 سال مکمل ہونے پر آج ملک بھر میں یومِ تکبیر ملی جوش و جذبے، قومی فخر اور تجدیدِ عہد کے ساتھ منایا جا رہا ہے۔ 28 مئی 1998ء کو پاکستان نے بلوچستان کے ضلع چاغی کے راس کوہ پہاڑوں میں کامیاب ایٹمی تجربات کر کے دنیا کی ساتویں ایٹمی طاقت ہونے کا اعزاز حاصل کیا تھا، جبکہ پاکستان ایٹمی صلاحیت رکھنے والا پہلا اسلامی ملک بھی بنا۔
پاکستان کے جوہری پروگرام کے بانی محسنِ پاکستان ڈاکٹر عبدالقدیر خان اور ممتاز سائنسدان ڈاکٹر ثمر مبارک مند کی قیادت میں پاکستانی سائنسدانوں کی ٹیم نے یہ تاریخی کامیابی حاصل کی، جس نے ملک کے دفاع کو ناقابلِ تسخیر بنا دیا۔
یومِ تکبیر دراصل قومی خودمختاری، دفاعی استحکام اور قومی وقار کی علامت سمجھا جاتا ہے۔ ان ایٹمی تجربات کے ذریعے پاکستان نے خطے میں طاقت کا توازن بحال کیا اور اپنے دفاع کو مضبوط بنیادوں پر استوار کیا۔
سابق وزیراعظم ذوالفقار علی بھٹو کا یہ تاریخی عزم آج بھی قوم کو یاد ہے کہ “ہم گھاس کھا لیں گے مگر ملک کو ایٹمی طاقت بنائیں گے”، جس نے پاکستان کے ایٹمی پروگرام کی بنیاد رکھنے میں اہم کردار ادا کیا۔
بھارت کے ایٹمی دھماکوں کے بعد عالمی دباؤ اور اقتصادی پابندیوں کے خدشات کے باوجود اس وقت کے وزیراعظم محمد نواز شریف نے جرات مندانہ فیصلہ کرتے ہوئے پاکستان کے ایٹمی تجربات کی منظوری دی، جسے قومی تاریخ کا ایک اہم سنگِ میل قرار دیا جاتا ہے۔
صدرِ مملکت اور وزیراعظم نے یومِ تکبیر کے موقع پر قوم کو مبارکباد دیتے ہوئے 28 مئی 1998ء کے ایٹمی دھماکوں کو قومی غیرت، مضبوط دفاع اور خطے میں امن و استحکام کی علامت قرار دیا ہے۔
