اٹلی بھر میں یومِ جمہوریہ جوش و خروش سے منایا گیا، فضائی مظاہرے نے سماں باندھ دیا

اٹلی بھر میں 2 جون کو “فیسٹا ڈیلا ریپبلیکا” (Festa della Repubblica) انتہائی جوش و خروش، قومی جذبے اور شاندار تقریبات کے ساتھ منائی گئی۔ اس موقع پر ملک بھر میں سرکاری تعطیل رہی جبکہ مرکزی تقریب دارالحکومت روم میں منعقد ہوئی جہاں ہزاروں شہریوں، سیاحوں اور سرکاری شخصیات نے شرکت کی۔
یومِ جمہوریہ اٹلی کی تاریخ کا ایک اہم دن ہے۔ 2 جون 1946 کو منعقد ہونے والے تاریخی ریفرنڈم میں اطالوی عوام نے بادشاہت کے خاتمے اور جمہوری نظام کے قیام کے حق میں ووٹ دیا تھا، جس کے نتیجے میں جدید اطالوی جمہوریہ وجود میں آئی۔ رواں سال اٹلی نے اپنی جمہوریہ کے قیام کے 80 سال مکمل ہونے کی تقریبات بھی منائیں۔
تقریبات کا آغاز صدرِ جمہوریہ سرجیو ماتاریلا کی جانب سے روم میں واقع الٹارے دیلا پاتریا (Altare della Patria) پر نامعلوم سپاہی کی یادگار پر پھولوں کی چادر چڑھانے سے ہوا۔ اس موقع پر ملکی سالمیت، آزادی اور قومی اتحاد کے لیے جانوں کا نذرانہ پیش کرنے والوں کو خراجِ عقیدت پیش کیا گیا۔
بعد ازاں روم کی تاریخی شاہراہ ویا دےئی فوری امپریالی (Via dei Fori Imperiali) پر شاندار فوجی پریڈ کا انعقاد کیا گیا، جس میں بری، بحری اور فضائی افواج کے دستوں کے علاوہ پولیس، سول پروٹیکشن اور دیگر قومی اداروں نے بھی حصہ لیا۔ ہزاروں شہریوں نے سڑکوں کے اطراف کھڑے ہو کر پریڈ کا مشاہدہ کیا اور قومی پرچم لہرا کر اپنی حب الوطنی کا اظہار کیا۔
تقریب کا سب سے دلکش مرحلہ اطالوی فضائیہ کی مشہور ایروبٹک ٹیم فریچے ٹریکولوری (Frecce Tricolori) کا فضائی مظاہرہ تھا۔ جنگی طیاروں نے آسمان پر سبز، سفید اور سرخ رنگوں کی دھاریاں بنا کر اطالوی پرچم کی عکاسی کی، جسے حاضرین نے بھرپور داد دی۔
ملک کے مختلف شہروں میں بھی خصوصی تقریبات، ثقافتی پروگرام، کنسرٹس اور عوامی اجتماعات منعقد کیے گئے۔ متعدد سرکاری عمارتوں کو قومی پرچموں اور روشنیوں سے سجایا گیا جبکہ عوام نے جمہوریت، آزادی اور قومی یکجہتی کے عزم کا اعادہ کیا۔
مبصرین کے مطابق یومِ جمہوریہ نہ صرف اٹلی کی سیاسی تاریخ کی یاد دلاتا ہے بلکہ یہ دن قومی اتحاد، جمہوری اقدار اور عوامی حاکمیت کے تصور کو بھی اجاگر کرتا ہے، جو جدید اٹلی کی بنیاد سمجھے جاتے ہیں۔