5 تا 7 اکتوبر، دوطرفہ تعلقات کے فروغ پر بات چیت، معاہدوں پر دستخط متوقع
کوالمپور (رانا علی زوہیب )
وزیرِ اعظم پاکستان محمد شہباز شریف ملائیشیا کے سرکاری دورے پر آج کوالالمپور روانہ ہو گئے۔ یہ دورہ 5 سے 7 اکتوبر تک جاری رہے گا۔
وزیرِ اعظم کے ہمراہ نائب وزیرِ اعظم و وزیرِ خارجہ اسحاق ڈار، وفاقی وزیر اطلاعات و نشریات عطاء اللہ تارڑ اور وزیرِ اعظم کے معاونِ خصوصی طارق فاطمی بھی جا رہے ہیں۔
وزیرِ اعظم محمد شہباز شریف کو یہ دعوت ملائیشیا کے وزیرِ اعظم انور ابراہیم نے دی ہے۔ اپنے دورے کے دوران وہ انور ابراہیم سے ملاقات کریں گے، جبکہ دونوں ممالک کے درمیان وفود کی سطح پر مذاکرات بھی ہوں گے۔
دورے کے دوران پاکستان اور ملائیشیا کے درمیان تعاون کے مختلف شعبوں میں معاہدوں اور مفاہمتی یادداشتوں (MoUs) پر دستخط متوقع ہیں۔
دونوں ممالک کے رہنما تجارت، آئی ٹی و ٹیلی کام، حلال انڈسٹری، سرمایہ کاری، تعلیم، توانائی، انفراسٹرکچر اور ڈیجیٹل معیشت میں دوطرفہ تعاون کے فروغ پر تبادلہ خیال کریں گے، جبکہ عوام سے عوام کے روابط کو مضبوط بنانے کے نئے مواقع پر بھی بات چیت ہو گی۔
