ایف آئی اے کی کارروائی، جعلی دستاویزات پر بیرون ملک جانیوالا ملزم گرفتار

لاہور (فدا محمد فدا )

 ایف آئی اے امیگریشن سرکل نے جعلی ویزے پر یونان جانے والے ملزم کو گرفتار کر لیا ۔

ایف آئی اے امیگریشن نے لاہور ایئرپورٹ پر کارروائی کرتے ہوئے ملزم محمد عرفان کو غیر قانونی طور پر بیرون ملک جاتے ہوئے حراست میں لیا۔

ترجمان ایف آئی اے لاہور کے مطابق ملزم محمد عرفان نے ابتدائی تفتیش کے دوران بتایا کہ اس نے سیالکوٹ کے دو ٹریول ایجنٹس ملک یاسین اور ملک اویس اعوان کو 15 لاکھ روپے دئیے تھے، ملزم نے یونان براستہ ترکی  غیر قانونی طریقے سے روانہ ہونا تھا۔

ایف آئی اے حکام نے بتایا کہ ملزم کو مزید تفتیش کے لیے اینٹی ہومن ٹریفکنگ سرکل کے حوالے کر دیا گیا  ہے۔

اس حوالے سے ڈائریکٹر ایف آئی اے لاہور زون سرفراز خان ورک کا کہنا ہے کہ غیر قانونی طریقے سے بیرون ملک جانے والوں کے خلاف کارروائی جاری رہے گی۔