پاک میڈیا جرنلسٹس فورم انٹرنیشنل کی رکنیت منسوخی کیلئے اقوامِ متحدہ ویانا میں درخواست جمع

پاکستانی انٹرنیشنل صحافی محمد عامر صدیق نے اقوامِ متحدہ ویانا (UNCAV)، یو این سی اے وی آسٹریا اور آئی اے ای اے (IAEA) ہیڈ آفس میں پاک میڈیا جرنلسٹس فورم انٹرنیشنل کی مبینہ وابستگی اور رکنیت کی منسوخی کیلئے باضابطہ درخواست جمع کروا دی ہے۔ درخواست میں فورم کی انتظامیہ پر جعلی نمائندگی، غلط بیانی، غیر شفاف سرگرمیوں اور مختلف اداروں کو مبینہ طور پر گمراہ کرنے کے الزامات عائد کرتے ہوئے قانونی کارروائی کا عندیہ بھی دیا گیا ہے۔
ذرائع کے مطابق فورم سے وابستہ بعض سینئر اراکین، سفارتی شخصیات اور بین الاقوامی سطح پر شریک افراد نے فورم کے نام، حیثیت اور مبینہ بین الاقوامی رجسٹریشن کے حوالے سے شدید تحفظات کا اظہار کرتے ہوئے اس کی مذمت کی ہے۔
اطلاعات کے مطابق فورم کی موجودہ انتظامیہ پر الزام ہے کہ اس نے غیر مصدقہ معلومات اور مبینہ جعلی بیانیے کے ذریعے سفارتکاروں، سیاسی شخصیات، جامعات اور میڈیا نمائندگان کو متاثر کرنے کی کوشش کی۔
تفصیلات کے مطابق فورم کے قیام کے دوران اسے مختلف بین الاقوامی اداروں کے ساتھ رجسٹر کروانے کی کوششیں کی گئیں، جن میں اقوامِ متحدہ ویانا (UNCAV) سے متعلق رجسٹریشن کا معاملہ بھی شامل تھا۔ اسی پلیٹ فارم کے تحت مختلف بین الاقوامی کانفرنسز، سفارتی تقریبات اور پروفیشنل ایونٹس منعقد کیے گئے جن میں مختلف ممالک کے سفارتکاروں، میڈیا نمائندگان، تعلیمی اداروں اور اہم شخصیات نے شرکت کی۔
تاہم اب بعض سینئر اراکین نے الزام عائد کیا ہے کہ فورم کی انتظامیہ نے اس کی بین الاقوامی حیثیت، رجسٹریشن اور نمائندگی کے حوالے سے مبینہ طور پر غلط اور غیر شفاف معلومات فراہم کیں، جس کے نتیجے میں نہ صرف سفارتی شخصیات بلکہ تعلیمی اور صحافتی حلقوں کو بھی گمراہ کیا گیا۔
سفارتی ذرائع کے مطابق بعض ڈپلومیٹس نے اس صورتحال پر تشویش کا اظہار کرتے ہوئے کہا ہے کہ انہیں ایسی معلومات کی بنیاد پر تقریبات میں مدعو کیا گیا جو بعد ازاں متنازع اور غیر مصدقہ ثابت ہوئیں۔ ان کے مطابق کسی بھی بین الاقوامی یا پروفیشنل پلیٹ فارم پر غلط نمائندگی اور غیر شفاف دعوے ناقابلِ قبول ہیں کیونکہ اس سے اداروں کے ساتھ ساتھ پاکستان کے مثبت تشخص کو بھی نقصان پہنچ سکتا ہے۔
ذرائع کا کہنا ہے کہ بعض جامعات کے ساتھ بھی مبینہ طور پر غلط معلومات شیئر کی گئیں جن میں ہزارہ یونیورسٹی کا نام بھی سامنے آیا ہے۔ تعلیمی حلقوں نے مطالبہ کیا ہے کہ اس پورے معاملے کی مکمل، آزادانہ اور شفاف تحقیقات کی جائیں۔
مزید اطلاعات کے مطابق فورم کی بعض سرگرمیوں کے حوالے سے مشکوک نوعیت کے خدشات بھی سامنے آئے ہیں، جنہیں مستقبل میں پاکستان مخالف عناصر یا تنظیمیں اپنے مفادات کیلئے استعمال کر سکتی ہیں۔ اسی تناظر میں فیصلہ کیا گیا ہے کہ اس معاملے اور مبینہ غلط نمائندگی کی تفصیلات دنیا بھر میں موجود اقوامِ متحدہ کے متعلقہ اداروں، بین الاقوامی تنظیموں اور دیگر متعلقہ حکام کو تحریری طور پر ارسال کی جائیں گی۔
اسی سلسلے میں انٹرنیشنل پاکستانی صحافی محمد عامر صدیق، جنہوں نے آسٹریا میں فورم کی اقوامِ متحدہ ویانا (UNCAV) سے متعلق رجسٹریشن کے عمل میں کردار ادا کیا تھا، نے اقوامِ متحدہ ویانا میں فورم کی مبینہ وابستگی اور رکنیت کی منسوخی کیلئے باضابطہ درخواست جمع کروائی ہے۔
انہوں نے مؤقف اختیار کیا کہ تحقیقات مکمل ہونے تک فورم کے ساتھ اقوامِ متحدہ (UN) یا یو این سی اے وی کے نام، لوگو، حیثیت یا وابستگی کو استعمال نہ کیا جائے۔ ان کے مطابق اگر بغیر اجازت یا تصدیق کے مستقبل میں اقوامِ متحدہ کے نام یا رجسٹریشن کا حوالہ استعمال کیا گیا تو متعلقہ افراد کے خلاف قانونی کارروائی عمل میں لائی جائے گی۔
ذرائع کے مطابق موجودہ صورتحال کے پیش نظر فورم کی اقوامِ متحدہ سے مبینہ وابستگی یا رجسٹریشن کو فوری طور پر معطل تصور کیا جا رہا ہے جبکہ اس معاملے کو قانونی اور انتظامی سطح پر بھی اٹھایا جا رہا ہے۔
مزید برآں اس معاملے کی تفصیلات پاکستان کے مختلف قومی اور بین الاقوامی میڈیا ہاؤسز کو بھی ارسال کیے جانے کا فیصلہ کیا گیا ہے تاکہ صحافتی، سفارتی اور تعلیمی حلقوں کو صورتحال سے مکمل طور پر آگاہ رکھا جا سکے۔
فورم کے بعض سینئر اراکین نے مطالبہ کیا ہے کہ تمام معاملات کی آزادانہ، شفاف اور غیر جانبدار تحقیقات کی جائیں تاکہ مستقبل میں کسی بھی کمیونٹی، میڈیا پلیٹ فارم یا بین الاقوامی فورم کو ذاتی مفادات، غلط نمائندگی یا مبینہ جعلی دعوؤں کیلئے استعمال ہونے سے روکا جا سکے۔